Молитва перед операцией и началом лечения

Господи, Боже наш, Благий Человеколюбче и Врачу душ и телес наших, немощи наша болезненно носяй и недуги наша приемляй; в тихости милуяй, превосходяй беззакония и изымаяй неправды, скорый в помощь и косный во гнев! Ты, яко Пастырь Добрый, на взыскание пришедый заблуждшаго овчате, малодушным даяй утешение и живот сокрушенным, источник кровоточивыя дванадесятолетен бывший исцеливый и слепорожденному очи открывый, дщерь хананеину от лютаго демона свободивый и исцеление разслабленному даровавый со оставлением грехов его, мытаря словом оправдавый и разбойника в последнем его исповедании приемый, грех мира вземый и на Кресте пригвоздивый. Тебе молимся и Тебе просим, Отче щедрот и Боже всякаго утешения, хирургический дар врачевания святителю Луке подавый, укрепи руку врача, да нуждную хирургию и врачевание благое совершит рабу Твоему в пременение недуга и тяжкия болезни, чающему еже от Тебе исцеления. Ей, Благоутробне и Многомилостиве Господи! Исцели раба Твоего, воздвигни его от одра болезненнаго и от ложа озлобления цела и всесовершенна, посети его щедротами Твоими, отжени от него всякий недуг и всякую немощь, даруй его Церкви Твоей благоугождающа и творяща волю Твою, яко да востав рукою Твоею крепкою, поработает Тебе со всяким благодарением. Твое бо есть, еже миловати и спасати ны, Боже наш, и Тебе славу возсылаем Отцу, и Сыну, и Святому Духу ныне, и присно, и во веки веков. Аминь.